“Doslıq festivalı”nıń ashılıw saltanatı bolıp ótti

“30-iyul – Xalıqlar doslıǵı kúni” bayramı hámde usı sánege baǵıshlanǵan “Doslıq festivalı”nıń ashılıw saltanatı bolıp ótti

Búgin Berdaq atındaǵı Qaraqalpaq mámleketlik akademiyalıq muzıkalı teatrında “30-iyul – Xalıqlar doslıǵı kúni” bayramı hámde usı sánege baǵıshlanǵan “Doslıq festivalı”nıń ashılıw saltanatı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, búgingi kúnde elimizde húrmetli Prezidentimizdiń basshılıǵında milletler aralıq doslıqtı hám tatıwlıqtı bekkemlew, xalıqlar arasında óz-ara awızbirshilik, keńpeyillik hám miyrim-shápáát ortalıǵın ele de kúsheytiw, olardıń milliy mádeniyatın, úrp-ádet hám dástúrlerin qásterlep-saqlaw hám rawajlandırıwǵa ayrıqsha itibar qaratılıp atırǵanlıǵın atap ótti.

Aytıp ótiw kerek,  sońǵı jılları elimizde “Xalıqlar doslıǵı kúni” bayramı hám “Doslıq festivalı” kóterińki ruwxta ótkerilip kelmekte. Hár jılı húrmetli Prezidentimiz tárepinen kóp milletli xalqımızǵa ayrıqsha húrmet kórsetilip, bir qatar Watanlaslarımız “Xalıqlar doslıǵı” kókirek nıshanı menen sıylıqlanıp, milliy-mádeniy oraylardı hár tárepleme qollap-quwatlawǵa itibar qaratılıp atır.
Bul baǵdarda ámelge asırılıp atırǵan ilajlar eń tiykarǵı baylıǵımız bolǵan elimiz tınıshlıǵın saqlawda, xalıqlar doslıǵın, milletler-aralıq tatıwlıqtı jáne de bekkemlewde áhmiyetli orın tutpaqta.

Búgingi kúnde elimizde jasap atırǵan túrli millet wákilleri bir maqset jolında birlesip, ana-Watanımızdı ele de rawajlandırıw jolında ayanbay miynet etip, joqarı tabıslardı qolǵa kirgizip kelmekte.

Búgingi ótkerilgen bayram saltanatında da mine usınday ámelge asırılıp atırǵan iygilikli jumıslar atap ótildi.

Ilaj dawamında bir qatar watanlaslarımızǵa kókirek belgisi hám bahalı sawǵalar tapsırıldı.

Bayram ilajı kórkem óner sheberleri atqarıwındaǵı koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti