«САҲРАДАҒЫ ЛУВР»: ЖЕТИСКЕНЛИК ҲӘМ ӮАЗЫЙПАЛАР

Усы жыл 8-октябрь күни Қарақалпақстан Республикасы И.В.Савицкий атындағы мәмлекетлик көркем өнер музейинде соңғы жылларда әмелге асырылған өзгерислер ҳәм жаңаланыӯларды кең жәмийетшиликке жеткериӯ, ғалаба хабар қураллары менен тығыз байланыс орнатыӯ мақсетинде баспасөз әнжуманы болып өтти.
Музей директоры Гүлбәҳәр Изентаеваның атап өткениндей, елимиздиң тарийхын ҳәм өтмишин келешек әӯладқа жеткериӯде әмелге асырылып атырған кең көлемли реформаларды халқымызға ҳәм мийманларға жақыннан таныстырыӯда жәмәәт тәрепинен нәтийжели жумыслар алып барылмақта.
Дүнья экспертлери менен қәнигелериниң баҳалаӯынша, Қарақалпақстан Республикасы И.В.Савицкий атындағы мәмлекетлик көркем өнер музейиниң коллекциясы Орайлық Азиядағы ең жақсы көркем өнер топламларынан бири болып табылады. Сонлықтан да ол «Саҳрадағы Лувр» аты менен кеңнен белгили.
Музей өзиниң 100 мыңға шамалас бийбаҳа экспонатлары менен пүткил дүньядағы мәденият, көркем өнер тараӯы ықласбентлерин өзине тартып келмекте.
Бул жерде соңғы жылларда көп ғана унамлы өзгерислер жүз бермекте. Өзбекстан Республикасы Мәденият министрлиги тәрепинен жыл сайын өткерилип киятырған «Жылдың ең жақсы музейи», «Жылдың ең жақсы көргизбеси», «Жылдың ең жақсы экскурсоводы», «Жылдың ең жақсы музей жанкүйери» ҳәм басқа да таңлаӯларда жеңимпаз болып келмекте. Музей ҳаққында «Сокровища Нукуса», «Саҳрадағы Лувр», «И.В.Савицкий атындағы Қарақалпақ мәмлекетлик көркем өнер музейи», «Әсирлер аса мәңги илҳам», «Қарақалпақ нағыслаӯ өнери — 2019-жыл» атамаларында китап және каталоглар баспадан шықты.
Быйылғы жылдың өткен 9 айы даӯамында музейге 81 мәмлекеттен 11774 турист келген болса, қаржы түсими 108 процентке орынланды. Өткен дәӯирде 13 музейде ҳәм ӯ көшпели көргизбе шөлкемлестирилди.Музейге келиӯшилерге қолайлықлар жаратыӯ ҳәм инновациялық технологияларды енгизиӯ мақсетинде усы жылдың июль айынан баслап музейде билетлер операциясының бирден-бир электрон системасы иске қосылды. Бул система билетлерди сатыӯ, есапқа алыӯ ҳәм тексериӯге бағдарланған. Сондай-ақ, музей экспонатлары менен өз бетинше танысыӯ ҳәм мағлыӯмат алыӯ ушын аудиогидлер ҳәм фонограмма иске түсирилди. Аудиогидлер музейдиң барлық бөлимлеринде экспонатлар ҳаққында 5 тилде (өзбек, рус, инглис, немис, француз) ҳәм жақын арада қарақалпақ тилинде толық мағлыӯмат береди. Сондай-ақ, интернет тармағы арқалы музейдиң еки имаратындағы экспозиция залларын виртуал тамашалаӯ имканияты жаратылған. Майыплығы болған шахслардың тамаша етиӯи ушын арнаӯлы арбаша ажыратылып, лифт иске түсирилди.
Бундай унамлы өзгерислер әлбетте, «Саҳрадағы Лувр», «Нөкис ғәзийнеси» атамалары менен дүньяға белгили бул музейдиң атын еле де танытыӯда үлкен әҳмийетке ийе болмақта.
Баспасөз әнжуманы даӯамында ғалаба хабар қуралларының ӯәкиллери музей басшылығынан келешекте әмелге асырылатуғын жойбарлар ҳаққында да кең түрде мағлыӯматлар алды.
Қарақалпақстан хабар агентлиги

Пікір үстеу

Э-пошта мекенжайыңыз жарияланбайды. Міндетті өрістер * таңбаланған