ҚАРАҚАЛПАҚ КӨРКЕМ ӨНЕРИ ЕВРОПАДА

Өзбекстан Республикасының Бельгиядағы елшиханасы ҳәм Қарақалпақстан Республикасы Жоқарғы Кеңеси тәрепинен усы жылдың 24-сентябрь — 2-октябрь күнлери аралығында Европаның бир қатар мәмлекетлеринде, атап айтқанда, Нидерландия пайтахты Гаагада, Люкцембург герцоглығында, Европа парламентинде, Бельгияның пайтахты Брюссельде елимиздиң экономика, саӯда, туризм тараӯы жетискенликлерин үгит-нәсиятлаӯ мақсетинде ушырасыӯ, қабыллаӯ ҳәм мәдений илажлар өткерилди.
Өткерилген бул мәдений илажларға республикамыздан Қарақалпақстан Республикасы Жоқарғы Кеңесиниң комитет баслығы Д.Қурбаниязов басшылығында делегация табыслы қатнасып қайтты.
Қабыллаӯ мәресиминде сөзге шыққан республикамыз ӯәкили Қарақалпақстанның бүгинги раӯажланыӯ басқышлары, алып барылып атырған жаратыӯшылық ислери, инвесторлар ушын жаратылған имкәниятлар, туризмниң раӯажланыӯы ҳаққында кең түрде айтып өтти.
Мәдений, дослық, дөретиӯшилик байланысларды беккемлеӯ, соның менен бирге халқымыздың бай, тарийхый мәденияты ҳәм көркем өнери үлгилерин, Ғәрезсизлигимиздиң жигирма сегиз жыллығының жилӯалылығын европалыларға таныстырыӯ мақсетинде өткерилген илажларда Өзбекстан мәмлекетлик филармониясы Қарақалпақстан Республикасы бөлиминиң директоры, жыраӯ, Қарақалпақстанға хызмет көрсеткен артист, «Шухрат» медалы ийеси Б.Есемуратов, Қарақалпақстанға хызмет көрсеткен артистлер М.Нуржанова, Б.Темирбаев, С.Қәллибеков, Б.Пердебаев, Қарақалпақстанға хызмет көрсеткен артист, ойыншы З.Жақсыбаева, филармония сазенделери Т.Айтаков, А.Темирбаевлар қатнасты. Олар атқарған қарақалпақ халық дәстанлары «Едиге», «Ғәрип ашық» тан үзиндилер, «Қарақалпақта», «Дем бермес», «Қарақалпақ қызлары», «Алты қыз», «Ала қайыс», «Жигитке», «Ӯатан» атамасындағы қарақалпақ халық қосықлары жыйналғанларға көтериңки йош бағышлады. Олар кийген миллий кийимлер көрген көздиң жаӯын алып, сазенделер атқарған миллий ырғаққа бай сазлар сыйқырлап, әжайып талант ийелериниң атқарыӯындағы йошлы қосықлары тамашагөйлерге илҳам бағышлап, «Илме султан», «Тановар», «Дойра рақси», «Мустахзод», «Лазги» ойынларын мәремине жеткерип атқарған Зийӯар менен қосылып ойынға түсип кетти.
— Сапар бизлерде үлкен тәсир қалдырды. Европалылар бизлерди жақсы күтип алды. Олардың бизиң миллий мәдениятымызға, көркем өнеримизге болған қызығыӯшылығы жоқары болды. Сапар даӯамында көплеген дослар арттырып, пикирлесип, тәжирийбе алмастық. Бундай илажлар дөретиӯши инсанларды илҳамландырып, талантымызды жоқары шеклерге өрлетеди,—дейди Саламат Қәллибеков.

Элмира САЙТЖАНОВА,
Журналист

Пікір үстеу

Э-пошта мекенжайыңыз жарияланбайды. Міндетті өрістер * таңбаланған