«УСТАЗ — ПИДАЙЫ ИНСАН»

27-сентябрь күни Республикалық көзи әззилер китапханасы оқыӯ залында 1-октябрь —Муғаллимлер ҳәм устазлар күни алдынан, «Дослық» ордени ийелери, белгили шайырлар Гүлистан Дәӯлетова ҳәм Жуманияз Өтениязовлардың 60 жасқа толыӯы мүнәсибети менен «Устаз — пидайы инсан» атамасындағы әдебий кеше шөлкемлестирилди.
Онда китапхана хызметкери Г.Қадирова шебер қәлем ийелери Г.Дәӯлетова ҳәм Ж. Өтениязовлардың өмири ҳәм дөретиӯшилик жолы ҳаққында баянат жасап, «Заман менен ҳәмнәпес шайырлар» атамасындағы китап көргизбесине китапхана библиографы Д.Төремуратова шолыӯ жасады. Буннан соң сөзге шыққан Қарақалпақстан Республикасы Мәденият министрлигиниң бас қәнигеси Б.Айтмуратов, Қарақалпақстан халық шайыры Н.Төрешова, китапхананың кәсиплик аӯқамы баслығы М.Ережепов ҳәм басқалар шайырларымызды мүбәрек жасқа толыӯы менен қутлықлап, жақсы тилеклерин билдирди. Олардың дөретиӯшилиги, инсаныйлық пазыйлетлери, шаңарақта ҳәм жәмийеттеги ийелеген орны, елимиздиң раӯажланыӯы жолында ислеп атырған пидәкерлик мийнетлери ҳаққында мақтаныш пенен айтып өтти.
Гүлистан Дәӯлетова 1958-жылы Шымбай районы, Шахаман аӯылында туӯылған. 1983-жылы ҚМУдың роман-герман филология факультетинде инглис тили қәнигелиги бойынша тәлим алып, мийнет жолын пайтахтымыздағы 19-санлы мектепте оқытыӯшылықтан баслаған. 1993-жылы ҚМУдың филология факультетин, екинши мәрте қарақалпақ тили ҳәм әдебияты қәнигелиги бойынша питкерип, усы факультетке жумысқа өтеди.
Ҳәзирги күнде пайтахтымыздағы 32-санлы улыӯма орта билим бериӯ мектебинде директор лаӯазымында ислеп келмекте.
Гүлистан Дәӯлетова республикалық газета-журналларда өзиниң қосықлары, публицистикалық мақалалары, илимий мийнетлери менен қатнасып турады. Р.Мусурман, М.Ахмад ҳәм басқа да шайырлар тәрепинен қосықлары өзбек тилине аӯдарылды.
«Сениң дәртиң менен жасайман ҳаял», өзбек тилинде «Ҳаял ышқы», «Қыз тахтым», «Гүзги толғаныслар», «Тумар қыз» ҳәм басқа да топламлары жарық көрди.
Жуманияз Өтениязов 1959-жылы Тахтакөпир районы, Тахтакөпир совхозында туӯылған. 1984-жылы ҚМУдың ҳуқықтаныӯ бөлимин питкерип, Қарақалпақстан телевидениесинде, «Қарақалпақстан» баспасында редактор, «Ғумша» журналында жуӯаплы хаткер, Қарақалпақстан Республикасы Ишки Ислер министрлигиниң баспасөз орайы басшысы, бас юристконсульти, НМПИ да оқытыӯшы болып ислеген. 2013-жылдан Қарақалпақстан Республикасы Ишки Ислер министрлигиниң «Тынышлық сақшысы» газетасының бас редакторы болып ислеп келмекте.
Шайырдың дәслепки қосықлар топламы 1988-жылы баспадан шықты. Оның он еки авторлық, төрт аӯдарма китабы, бес поэмасы жарық көрди. Оның дөретпелери «Постда», «На посту», «Щит» газета-журналларында өзбек, рус тиллеринде жәрияланды. Жақында ол «Урланған сейф» детектив гүрриңлер топламын оқыӯшылар қәӯимине усынды.
Пикир алысыӯлар менен мазмунлы өткен ушырасыӯ барысында жыйналғанлар өзлерин қызықтырған сораӯларға жуӯаплар алып, дөретиӯшилер туӯралы көплеген мағлыӯматларға ийе болды.
Илаж соңында шайырлар да ушырасыӯды шөлкемлестирген китапхана жәмәәтине өз миннетдаршылықларын билдирип, китапларынан саӯға етти.
Эльмира САЙТЖАНОВА,
Журналист

Пікір үстеу

Э-пошта мекенжайыңыз жарияланбайды. Міндетті өрістер * таңбаланған