«ҚОНАҚ»

Айтмуратов Байрам Полатбаевич 1986-жылы 9-майда Қарақалпақстан Республикасының Бозатаӯ районында туӯылды. 2008-жылы Өзбекстан мәмлекетлик көркем өнер ҳәм мәденият институтының көркем өнертаныӯ журналистикасы бөлимин тамамлаған. Дәслепки мийнет жолын 2009-жылы Өзбекстан мәлимлеме агентлигинде шолыӯшы болып ислеӯден баслаған. Кейинги жыллары ол бул жерде жетекши шолыӯшы, бөлим баслық, бас редактор орынбасары болып жумыс ислейди. 2018-2019-жыллары Өзбекстан Жазыӯшылар аӯқамының «Медиа орай» бөлими баслығы болып жумыс алып барды. Ҳәзир Қарақалпақстан Республикасы Мәденият министрлигинде бас қәниге болып табыслы ислеп киятыр.
Байрам Айтмуратов Өзбекстан Жазыӯшылар аӯқамының ағзасы, Қарақалпақстан Республикасында өткерилген мәмлекетлик илажлар, Ғәрезсизлик, Наӯрыз байрамлары менен басқа да сәнелерге бағышланған салтанатлардың сценарий авторы.
Б.Айтмурат талантлы, жас журналист, сценарист ҳәм жазыўшы сыпатында да халқымызға жақсы таныс.

Жақында Ташкент қаласындағы «Наврӯз» баспасы тәрепинен жазыӯшы Байрам Айтмуратовтың «Қонақ» атлы өзбек тилиндеги туңғыш гүрриңлер топламы баспадан шықты. Онда сиз автордың балалықтың бийғубар мәӯритлери, өзине жараса тәшӯишлериниң көркем сүӯретлеӯиниң гүӯасы боласыз. Досты ушын муҳаббат хатын жазған баланың ҳүждан азаплары, ӯақыт шегарасында жаслық деп аталған инсан өмириниң гөззал паслындағы адам жүрегиндеги таныс толғанысларды түйесиз. Аӯыл турмысы, адамлардың ишки дүньясын жас жазыӯшының өткир нәзери арқалы көркемленгенлигин билген оқыӯшы өз қандай өмир сүрип атырғанлығын талқылап баслайды. Әсиресе, бул китаптағы «Жүрекке жүк түсти», «Қонақ», «Кейинги сапар», «Аға-инилер» ҳ.т.б. да шығармаларында өз көринисин тапқан.
Китап Өзбекстан Жазыӯшылар аӯқамы тәрепинен баспаға усынылып, «Ижод» жәмийетлик фонды тәрепинен қаржыландырылған. «Биринши китабым» жойбары бойынша баспа жүзин көрген бул топлам 10 000 нусқада, офсет усылында басылған болып, оның жуӯаплы редакторлары Азиз Саид ҳәм Орзиқул Эргашовлар.

Малика ИМАКОВА,
НМПИдиң Қарақалпақ тили ҳәм әдебияты қәнигелигиниң 1-курс студенти

Пікір үстеу

Э-пошта мекенжайыңыз жарияланбайды. Міндетті өрістер * таңбаланған