«МЕҲРАБТАН ШАЯН»

Жақында Қарақалпақ мәмлекетлик Жас тамашагөйлер театрында өзбек әдебиятының уллы тулғасы Абдулла Қодирийдиң «Меҳрабтан шаян» романы тийкарында сахналастырылған «Меҳрабтан шаян» спектаклиниң премьерасы болып өтти. У.Үсаров инсценировкасын қарақалпақ тилине Б.Айтмуратов аӯдарма ислеген. Оны театрдың талантлы жас режиссёры Ө.Бектурғанов сахналастырды.
Спектакльде Анвар менен Раноның пәк муҳаббаты ҳәм олардың бир-бирине жетисиӯ жолындағы қыйыншылықлары, ханлық дәӯириндеги адамлардың ерки өзлеринде емеслиги, жоқары лаӯазымға ерисиӯде гүнасыз инсанларға көрсеткен жаманлықлары сәӯлеленеди.
Сондай-ақ, муқаддес дәргай, мешиттен шыққан, сол дәргайға мүнәсип емес, инсапсыз, өзгениң өскенин көре алмайтуғын адамлардың жаманлықлары кескин ҳәрекетлерде көрсетиледи. Жеңил ҳәзил, күлки ҳәм юморды айырым образлар тәбиятына тән характерлер арқалы көрсеткен.
Жақсылық ҳәмийше жеңип шығады. Спектакль соңында Анвардың жолын тосып, оның өсиӯине кесент етип жүрген адамлар шарасыз қалып, жақсылықты сағынып жасайтуғын адамлар мурат-мақсетлерине жетеди.
Спектакльде бас қаҳарманлар-Анварды жас талантлы актёр Р.Тлемисов, Раноны-Б.Бахиевалар табыслы атқарып шықты.
Сондай-ақ, онда театр артистлеринен: С.Арзиев (Салый махдум), Өзбекстанда хызмет көрсеткен артист Л.Халықназарова (Нигар айым), Ж.Бердибеков (Султаналы мырза), Р.Уразбаев (Шахидбек), П.Төлегенов (Абдурахман), Б.Жапаров (Шукур суӯпы), И.Бегжанов (Сапар бозшы), Ҳ.Ибрагимова (Гүлшан), М.Нуратдинов (Қудаяр хан), Ш.Дәӯлетмуратов (Мухаммед Шарип), Қ.Пердебаев (удайшы), Ж.Абдимов (тунқатар)лар өз рольлерин мәремине жеткерип атқарып шықты.
Сахнаның спектакль ӯақыяларына сай безелиӯинде сахналастырыӯшы художник Т.Шардеметовтың мийнетлери айрықша екенлигин айтып өтиӯ орынлы. Спектакль музыкаларын Н.Есемуратов жақсы таңлаған.
Эльмира САЙТЖАНОВА,
журналист

Пікір үстеу

Э-пошта мекенжайыңыз жарияланбайды. Міндетті өрістер * таңбаланған