БАЛАЛАР МУЗЫКА ҲӘМ КӨРКЕМ ӨНЕР МЕКТЕПЛЕРИНИҢ БАСШЫ, ОҚЫТЫӮШЫ ҲӘМ КОНЦЕРТМЕЙСТЕРЛЕРИНИҢ МИЙНЕТИНЕ ҲАҚЫ ТӨЛЕӮ ҲӘМ ОЛАРДЫ МАТЕРИАЛЛЫҚ ХОШАМЕТЛЕӮ СИСТЕМАСЫН ЖЕТИЛИСТИРИӮ ҲАҚҚЫНДА ӨЗБЕКСТАН РЕСПУБЛИКАСЫ ПРЕЗИДЕНТИНИҢ ҚАРАРЫ

Балалар музыка ҳәм көркем өнер мектеплеринде тәлим-тәрбия бериӯдиң сапасын жаңа басқышқа көтериӯ, көп жыллар даӯамында өзиниң пидайы мийнетлери менен билимлендириӯдиң сапасын арттырыӯға үлес қосып киятырған балалар музыка ҳәм көркем өнер мектеплериниң басшы ҳәм педагог хызметкерлерди социаллық қорғаӯды күшейтиӯ, олардың дөретиӯшилик шеберлигин ҳәм мийнетин мүнәсип хошаметлеӯ системасын буннан былай да жетилистириӯ мақсетинде:
1. Өзбекстан Республикасы Мәденият министрлиги, Бәнтлик ҳәм мийнет қатнасықлары министрлиги және Қаржы министрлигиниң балалар музыка ҳәм көркем өнер мектеплери хызметкерлериниң базалық тариф ставкаларын 2019-жыл 1-октябрьден:
директор ҳәм директор орынбасарлары ушын – 1,5 есеге;
оқытыӯшылар ҳәм концертмейстерлер ушын – 1,25 есеге арттырыӯ ҳаққындағы усыныслары мақуллансын.
2. Өзбекстан Республикасы Мәденият министрлиги мәпдар министрликлер ҳәм уйымлар менен биргеликте еки ай мүддетте:
а) балалар музыка ҳәм көркем өнер мектеплеринде оқыӯ-тәрбия процессин түп-тийкарынан жақсылаӯ мақсетинде алдыңғы сырт ел тәжирийбесин үйрениӯ тийкарында:
билимлендириӯ сапасын баҳалаӯдың заманагөй системасын ислеп шықсын ҳәм тастыйықласын;
мәлимлеме-коммуникация технологияларынан кең пайдаланыӯды нәзерде тутқан ҳалда оқыӯ реже және бағдарламаларды қайта көрип шықсын ҳәм тастыйықласын;
б) балалар музыка ҳәм көркем өнер мектеплери:
басшы хызметкерлер лаӯазымына талабанларды таңлаӯ тийкарында сайлаӯ әмелиятын енгизиӯ ҳәм оларды хошаметлеӯди күшейтиӯ;
басшы хызметкерлердиң аралықтан турып қәнигелигин арттырыӯ системасын нәтийжели шөлкемлестириӯ ҳәм қамтып алыӯын кеңейтиӯ;
оқытыӯшылары ҳәм концермейстерлерине қәнигелигин арттырыӯ талаплары, олардың жумысын баҳалаӯ системасы және билимлендириӯдиң мазмун сапасына қойылған мәмлекетлик талапларды жетилистириӯ илажларын көрсин.
3. Өзбекстан Республикасы Қаржы министрлиги усы қарарды әмелге асырыӯ менен байланыслы қәрежетлерди қаржыландырыӯ ушын талап етилетуғын зәрүр қаржыларды 2019-жыл ушын ажыратсын және 2020-жылдан баслап Өзбекстан Республикасы Мәмлекетлик бюджет қәрежетлериниң параметрлеринде нәзерде тутсын.
4. Өзбекстан Республикасы Мәденият министрлиги мәпдар министрликлер ҳәм уйымлар менен биргеликте бир ай мүддетте нызам ҳүжжетлерине усы қарардан келип шығатуғын өзгерислер ҳәм қосымшалар ҳаққында Министрлер Кабинетине усыныслар киргизсин.
5. Усы қарардың орынланыӯын қадағалаӯ Өзбекстан Республикасының Бас министри А.Н.Ариповқа ҳәм Өзбекстан Республикасы Президентиниң кеңесгөйи А.А.Абдувахитовқа жүкленсин.

Өзбекстан Республикасы
Президенти Ш.МИРЗИЁЕВ
Ташкент қаласы, 2019-жыл 30-сентябрь

Пікір үстеу

Э-пошта мекенжайыңыз жарияланбайды. Міндетті өрістер * таңбаланған