ЕҢ УЛЛЫ, ЕҢ ӘЗИЗ БАЙРАМ МҮНӘСИП БЕЛГИЛЕНДИ

Өзбекстан Республикасы Ғәрезсизлигиниң 28 жыллығына бағышланып пайтахтымыздағы Ашық театрда болып өткен «Жанажан Өзбекстаным, мәңги бол аман!» атамасындағы театрластырылған әдебий музыкалы-хореографиялық байрам салтанатынан репортаж
Президентимиздиң басшылығында елимизде тынышлық ҳәм турақлылықты беккемлеӯ, инсан ҳуқықлары, еркинликлери ҳәм мәплерин тәмийинлеӯ, ?атанымызды ҳәр тәреплеме раӯажландырыӯ, оның халықаралық майдандағы абырай-мәртебесин арттырыӯ бағдарында кең көлемли реформалар әмелге асырылмақта.
Атап айтқанда, «Жедел инвестициялар ҳәм социаллық раӯажланыӯ жылы» мәмлекетлик бағдарламасы, «Абат аӯыл», «Абат мәҳәлле», «Ҳәр бир шаңарақ – исбилермен», «Жаслар – келешегимиз», «Бес унамлы баслама» сыяқлы әҳмийетли бағдарламалар ҳәм режелер шеңберинде қала ҳәм район орайларында, ҳәттеки, шетки аӯылларымызға шекем қурылыс және дөретиӯшилик жумыслары алып барылды. Соның менен бирге, халқымыздың турмыс дәрежесин жақсылаӯ, киши бизнес ҳәм жеке исбилерменликти раӯажландырыӯ, жаслар, ҳаял-қызлар, кексе әӯлад ӯәкиллери, социаллық қорғаӯға мүтәж инсанларға ғамқорлық көрсетиӯге айрықша итибар қаратылмақта.
Өзбекстан Республикасы Президентиниң усы жыл 8-июль күнги «Өзбекстан Республикасы мәмлекетлик ғәрезсизлигиниң жигирма сегиз жыллық байрамына таярлық көриӯ ҳәм оны өткериӯ ҳаққында»ғы арнаӯлы қарары тийкарында республикамыз бойлап кең көлемли таярлық жумыслары алып барылды. Быйылғы жылғы байрамның «Жанажан Өзбекстаным, мәңги бол аман!» сүрени астында өткерилиӯинде де терең мәни бар. Ҳәр жылдағыдай, быйылғы жылы да байрам алдынан бир қатар өндирислик, социаллық-мәдений объектлер халқымыздың ийгилиги ушын пайдаланыӯға тапсырылды.
2019-жыл, 29-август. Пайтахтымыздағы Ашық театр, оның әтирапы елимиз ғәрезсизлигин, мийнеткеш халқымызды, халықлар дослығын улығлаӯшы шақырық-сүренлер, инсанға заӯық бағышлайтуған рәңбәрең гүллер, түрли реңдеги жақтыландырыӯшы шырақлар менен безелген.
Саат 19.30. Шақырық сазы менен байрам салтанаты басланып, сөз Қарақалпақстан Республикасы Жоқарғы Кеңесиниң Баслығы, Өзбекстан Қаҳарманы М.Ерниязовқа берилди.
Республикамыз басшысы жыйналғанларды, гүллән халқымызды елимиз ғәрезсизлигиниң 28 жыллық байрамы менен қызғын қутлықлады.
Атап өтилгениндей, бүгинги күни елимиздиң барлық жерлери сыяқлы республикамыздың қала ҳәм районлары жаңаша шырай ашып, үлкен дөретиӯшилик майданына айланып бармақта. Соның нәтийжесинде биринши ярым жыллықта жалпы аймақлық өнимлердиң көлеми u триллион сумды қураған болса, жыл ақырына шекем бул көрсеткиш 15 триллион сумға жетиӯи күтилмекте.
Өткен алты ай даӯамында қурылыс жумысларының көлеми 45 пайызға, инвестициялардың көлеми 19,4 пайызға, тутыныӯ товарларын ислеп шығарыӯ көлеми 8,4 пайызға, аӯыл хожалығы өнимлерин жетистириӯ көлеми 5,4 пайызға, хызметлер көлеми 18 процентке өскени-экономикамыздың тез пәтлер менен раӯажланып атырғанын дәлиллейди.
Усы жылдың 20—21-август күнлери Президентимиздиң республикамызға болған сапары, сондай-ақ Нөкис қаласында халқымыз бенен болған ушырасыӯы үлкен тарийхый ӯақыяларды, қуӯанышлы мәӯритлерди, раӯажланыӯымыздың жаңа басқышын өзинде жәмлейди. Болып өткен ушырасыӯларда елимиздиң басшысы республикамызды раӯажландырыӯда бес тийкарғы ӯазыйпаны белгилеп берди. Халқымыздың өтиниш тилеклеринен келип шығып, 2019—2022-жылларда жәми 14 триллион 684 миллиард сумлық 697 жойбарды әмелге асырыӯ, соның есабынан 14 мыңға шамалас жаңа жумыс орнын жаратыӯ ӯазыйпалары белгилеп алынды. Соның ишинде, сырт ел инвестицияларының үлеси 914 миллион 735 мың АҚШ долларын қурайды.
Байрам алдынан бир қатар заманласларымыз орден ҳәм медальлар, мәмлекетлик атақлар алыӯға миясар болды. Әсиресе, Қарақалпақстан Республикасы Жоқарғы Кеңесиниң Баслығы М.Ерниязовқа елимиздиң ең жоқары сыйлығы — «Өзбекстан Қаҳарманы» атағының берилиӯи Президентимиздиң халқымызға болған жоқары ҳүрмет ҳәм ғамқорлығының айқын көриниси болды. Бул қуӯанышлы хабарды байрам қатнасыӯшылары узақ даӯам еткен қол шаппатлаӯлар менен қарсы алды.
Буннан соң Өзбекстан ҳәм Қарақалпақстан Республикаларының мәмлекетлик гимнлери жаңлады. Бул жерде орнатылған монитор арқалы көрсетилген Президентимиздиң басшылығында ғәрезсизлик жылларында қолға киргизилген табыслар, республикамызда, соның ишинде, Мойнақ районында бүгинги күнги әмелге асырылып атырған кең көлемли қурылыс жумыслары ҳәр бир қатнасыӯшыда айрықша қуӯаныш және мақтаныш сезимлерин пайда етти.
Байрам тамашалары Өзбекстан ҳәм Қарақалпақстан Республикаларына хызмет көрсеткен артист, «Ниҳол» сыйлығының ийеси Мақсет Өтемуратовтың атқарыӯындағы «Туӯған жер» қосығы менен басланды. Буннан кейин ?атан, туӯылған жер, ғәрезсизлик ҳаққындағы қосықлар менен аяқ ойынлар атқарылды.
Бүгинги күни елимизде жасларды ҳәр тәреплеме қоллап-қуӯатлаӯ, олардың қәбилетлерин жүзеге шығарыӯлары ушын барлық шараят жаратылған. Булар Нөкис қаласындағы 1-12-22-санлы балалар музыка ҳәм көркем өнер мектеплери оқыӯшыларының, Нөкис қалалық мәденият бөлими жанындағы «Нәӯше» үлгили балалар эстрада ансамбли, Жаслар орайы жанындағы «Шуғла» ҳәм «Жулдызша» ансамбльлери ағзаларының атқарыӯындағы «Бес баслама-бес имканият» композициясында және бир мәрте өз көринисин тапты.
Елимизде денетәрбия ҳәм спортты раӯажландырыӯға айрықша әҳмийет берилмекте. Бүгинги күни спортшыларымыз келеси жылы Японияда болып өтетуғын XXXII жазғы Олимпиада ойынларына лицензия алыӯ ушын халықаралық жарысларға мүнәсип қатнасып атыр. Бунда оларға әӯмет тилеймиз. Байрам тамашасының спорт бөлиминде келешегинен үмит күттиретуғын жас спортшылардың көргизбели шығыӯы болды.
Елимиздиң аймақлық пүтинлигин, шегераларымыздың тынышлығын, халқымыздың абадан турмысын тәмийинлеӯде Қураллы Күшлеримиз халқымыздың ҳақыйқый қорғанына айланбақта. Байрам тамашасында Арқа-Батыс әскерий округи әскерлериниң салтанатлы шығыӯы, олар тәрепинен ?атан сүйиӯшилик сезимлерин жырлаӯшы қосықлар жыйналғанларда айрықша тәсир қалдырды.
Республикамызда түрли миллет ӯәкиллери бир шаңарақ ағзаларындай беккем аӯызбиршиликте жасап ҳәм мийнет етип келмекте. Илажда түркмен, рус халықларының миллий қосықлары шеберлик пенен атқарылды.
Байрам тамашасы «Гүлленген Өзбекстан» көркем композициясы менен жуӯмақланды.

Д.АБИБУЛЛАЕВ
Қарақалпақстан хабар агентлигиниң шолыӯшысы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған