ТАРИЙХ—ЖУӮМАҚ ШЫҒАРЫӮҒА ШАҚЫРАДЫ

Бердақ атындағы Қарақалпақ мәмлекетлик университети тәрепинен шөлкемлестирилген репрессия қурбанларын еслеӯ музейинде көплеген ҳүжжет ҳәм буйымлар сақланбақта.
—Бүгинги күнде фондымызда 110 нан артық тараӯға тийисли китаплар, 200 ден артық архив ҳүжжетлери, сол дәӯирде жазылған араб имласындағы 5 китап-қолланба, репрессия қурбанлары болған заманласларымыздың 370 тан артық сүӯретлери, олар пайдаланған үй-руӯзыгер ҳәм жеке буйымлар, 10 ға жақын картина, репрессия қурбанлары яки олардың перзентлеринен жазып алынған аӯызеки тарийх мағлыӯматлары жазылған дисклер сақланбақта,— дейди музей директоры, тарийх илимлери кандидаты, доцент Алишер Қудияров. —Фондымызды ҳәм экспозицияны толтырыӯ мақсетинде музей хызметкерлери тәрепинен Қарақалпақстан Республикасының бәрше қала ҳәм районларында экспонат жыйнаӯ жумыслары алып барылмақта. Нәтийжеде усы күнге шекем 90e экспонат топланды.
Буннан тысқары, Нөкис қаласы ҳәм районларда репрессия дәӯири бойынша материаллық буйым ҳәм ҳүжжетлер, усы дәӯирге тийисли табылмалар жәмленди. Сондай-ақ, Шымбай, Кегейли, Хожели, Қараөзек, Төрткүл, Елликқала, Беруний районларындағы китапханалардан керекли материаллар алынды.
Соның менен бирге усы жылдың январь айында музей хызметкерлери Әмиӯдәрья районында хызмет сапарында болып, 1984-1986-жыллары «Пахта иси» бойынша репрессияға ушыраған Юлдаш Файзуллаев, Ешимбет Кенжаев, Умар Юлдашев, Шукурулла Гулманов, Сабур Бабажанов, Юлдаш Сабировлардың шаңарақларынан олар пайдаланған буйым, қамаққа алынғаны ҳәм ақланғанлығы ҳаққындағы ҳүжжетлерин алып келди. Сондай-ақ, Шымбай районында 1801-1888-жылларда жасаған Ережеп бий ҳаққында мағлыӯматлар жыйналды ҳәм 1950-жыллары репрессияға ушыраған Қалимбет ахун Өтемуратовтың жеке өзи пайдаланған буйымлары музейге әкелинди.
Музейде ҳәр түрли мазмунларда илажлар өткериледи. Жоқары оқыӯ орынларында Репрессия қурбанларын еслеӯ музейлериниң шөлкемлестирилиӯи халқымыздың, студент-жаслардың қәлбинде өткенлерге ҳүрмет-иззет, бүгинги күнлерге шүкиршилик туйғыларын және де раӯажландырыӯға хызмет етеди.
Қарақалпақстан хабар агентлиги

Пікір үстеу

Э-пошта мекенжайыңыз жарияланбайды. Міндетті өрістер * таңбаланған