«АНА ЎАТАН КЕЛБЕТИ — ХУДОЖНИКЛЕР НӘЗЕРИНДЕ»

28-август күни Қарақалпақстан Республикасы И.В.Савицкий атындағы мәмлекетлик көркем өнер музейинде Ғәрезсизлигимиздиң жигирма сегиз жыллық байрамына бағышланып шөлкемлестирилген «Ана Ӯатан келбети художниклер нәзеринде» атамасындағы көргизбе салтанатлы жағдайда ашылды.
Көргизбениң тийкарғы мақсети: көркем өнер ықласбентлерин Ӯатанды улығлаӯшы ҳәм жырлаӯшы шығармалар менен жақыннан таныстырыӯ, көп миллетли халқымызды, әсиресе жасларымызды гөззаллық дүньясына шақырыӯ, оларды Ана Ӯатанымызға садықлық руӯхында тәрбиялаӯдан ибарат.
Көргизбеде тийкарынан халқымыздың үрп-әдет, дәстүрлерин, турмыс тәризиндеги өзгешелигин, журтымыздың өзине тән колоритин, үлкемиздиң өзгеше тәбиятын сүӯретлеӯши художниклердиң 50 ден аслам пейзаж, натюрморт жанрларында дөретилген картиналары ҳәм тематикалық композициялары тамашагөйлер нәзерине усынылды. Олар арасында бизиң елимизге келип, пүткил өмирин ҳәм дөретиӯшилигин үлкемиз бенен байланыстырған И.В.Савицкий, Р.Матевосянның сондай-ақ үлкемизде туӯылып өскен А.Өтегенов, А.Еримбетов, Ж.Беканов, Б.Серекеев, У.Сапаров, М.Антонов, Ж.Лепесов, М.Қудайбергенов, И.Алибеков сыяқлы қарақалпақ художниклериниң ҳәр түрли мазмундағы жумыслары орын алған.
Эльмира САЙТЖАНОВА,
журналист

Пікір үстеу

Э-пошта мекенжайыңыз жарияланбайды. Міндетті өрістер * таңбаланған