БОЗАТАӮДА ҒӘРЕЗСИЗЛИК БАЙРАМЫ

Өзбекстан Республикасы Ғәрезсизлигиниң 28 жыллық байрамын Бозатаӯ районы халқы да үлкен қуӯаныш ҳәм өзгеше көтериңкилик руӯхында белгиледи. Усы жылдың 20—21-август күнлери Президентимиз Ш.Мирзиёевтың республикамызға болған сапары даӯамында шарӯашылыққа қәнигелестирилген Бозатаӯ районын шөлкемлестириӯ ҳаққындағы басламасын гүллән халқымыз, әсиресе, бозатаӯлылар үлкен қуӯаныш пенен қарсы алған еди.
31-август күни район орайындағы стадионда «Жанажан Өзбекстаным, мәңги бол аманЁ» сүрени астында байрам илажы шөлкемлестирилди. Оған Қарақалпақстан Республикасы Жоқарғы Кеңесиниң комитет баслықлары, Нөкис қаласы ҳәм район ҳәкимлери, министрлик, ведомоствалардың басшылары ҳәм кең жәмийетшилик ӯәкиллери қатнасты. Қарақалпақстан Республикасы Министрлер Кеңесиниң Баслығы Қ.Сариев жыйналғанларды Қарақалпақстан Республикасы Жоқарғы Кеңеси ҳәм Министрлер Кеңеси атынан ең уллы, ең әзиз байрамымыз бенен қызғын қутлықлады.
Буннан соң илаж қатнасыӯшыларына Қарақалпақстан Республикасы Мәденият министрлиги тәрепинен таярланған әдебий, музыкалы хореографиялық байрам концерти қойып берилди. Республикамызға белгили көркем өнер шеберлеринен: М.Сапаева, Г.Мунтеева, М.Өтемуратов, А.Надырова, К.Хитжанов, С.Аннақулова, М.Нуржанова, Р.Сейтжанов, «Ниҳол» мәмлекетлик сыйлығының ийелери: Ш.Турсынбаев, Н.Махаммадияровлар ҳәм Бердақ атындағы Қарақалпақ мәмлекетлик академиялық музыкалы театры, Өзбекстан мәмлекетлик филармониясы Қарақалпақстан Республикасы бөлиминиң дөретиӯшилик жәмәәтлери менен жас талант ийелери: С.Абиев, С.Шерманов, А.Кәримбаевлар, Нөкис мәмлектелик педагогикалық институты,Өзбекстан мәмлекетлик көркем өнер ҳәм мәденият институты Нөкис филиалы, Нөкис қәнигелестирилген мәденият мектеби, пайтахтымыздағы 22-санлы БМКӨМ ниң «Айқулақ» ансамбли ҳ.т.б. да хош ҳаӯаз ийелериниң атқарыӯындағы йошлы концерт бағдарламасы бәршениң кеӯил кейпиятын көтерип, ойынға түсирди.
—Бүгин районымызда үлкен байрам. Себеби, бозатаӯлылар бүгин өз алдына отаӯ тигип, районды ҳәр тәреплеме раӯажландырыӯ бойынша әллеқашан жумыслар басланып кеткенлигинен шексиз қуӯанышта. Аймағымыздың жети жастан, жетпис жасқа шекемги турғанлары ҳәзир усы стадионда жәмленип, биргеликте ең уллы байрам-Ғәрезсизлигимиздиң 28 жыллық тойын тойламақта. Бизге қаратылған бундай итибар ҳәм ғамхорлықтан шексиз миннетдармыз, —дейди райондағы ңӯ-санлы улыӯма билим бериӯ мектебиниң директоры орынбасары Қуӯатбай Қалмуратов.
Шынында да, усы күни район турғынларының қуӯанышының шеги жоқ. Әсиресе, концерт соңында байрам салютиниң атылыӯы аӯыл балаларына бир дүнья шадлық уласқан болса, бәршемиздиң кеӯлимизди толқынландырып жиберди.
Гүлмира ПАЛӮАНОВА,
көркем өнертаныӯ журналисти

Пікір үстеу

Э-пошта мекенжайыңыз жарияланбайды. Міндетті өрістер * таңбаланған