МОЙНАҚТА ЖАҢА МУЗЕЙ ЖУМЫС БАСЛАДЫ

Бүгин Мойнақ үлкен өзгерис ҳәм жаӊаланыӯлар қушағында. Бул үлкениӊ бай тарийхы, миллий үрп-әдет ҳәм дәстүрлерин қәстерлеп сақлаӯ, оны келешек әӯладқа сап халында жеткериӯ әдиӯли ӯазыйпамыз. Усы мақсетте өткен жылы Мойнақ «Экология» музейи шөлкемлестирилип пайдаланыӯға тапсырылған еди.
Бул музейде ҳайӯанлар әлеми, қуслар фаунасы, өнерментшилик ҳәм кестешилик үлгилери, Мойнақ консерва заводыныӊ буйымлары, сондай-ақ, қалада Арал теӊизи бойларында жасап дөретиӯишилик еткен художниклер Р.Матевосян ҳәм Ф.Мадгазинниӊ картиналары орын алған.
Бул жерге туристлерди кеӊнен тартыӯ, бай мәдениятымыз ҳәм тарийхымызды кеӊ жәмийетшиликке еле де кеӊнен таныстырыӯ мақсетинде райондағы Ески кемелер жыйналған жерди Кемелер музейи заманагөй комплексине айландырыӯ бойынша жумыс алып барылып атырғанлығы халқымызға мәлим. Жақында усы жерде «Арал теӊизи тарийхы» музейи шөлкемлестирилип, Қарақалпақстан Республикасы тарийхы ҳәм мәденияты мәмлекетлик музейи хызметкерлери тәрепинен музейдиӊ экспозициясы исленип, халқымызға тапсырылды.
Бул жерде XX әсирдиӊ екинши ярымындағы Арал теӊизи бойында түсирилген фотосүӯретлер ҳәм жергиликли художниклердиӊ Мойнақ ҳәм Арал теӊизиниӊ өмирин сәӯлелендириӯши картиналар орын алған.

Айнур ПОЛАТ,
ҚР тарийхы ҳәм мәденияты мәмлекетлик музейи
бөлим баслығы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған