КӨРКЕМ ӨНЕР ХАЛЫҚЛАРДЫ БИРЛЕСТИРЕДИ

Және бир неше күннен соң Самарқандта «Шарқ тароналари» он екинши халықаралық музыка фестивалы басланады.
1997-жылдан берли ҳәр еки жылда дәстүрий түрде өткерилип киятырған бул көркем өнер байрамы өткен дәӯир аралығында дүнья көлеминдеги ири мәдений илажға айланды. Онда жер жүзиниң барлық континентлеринен ӯәкиллер қатнасып, өзлериниң әййемги ҳәм миллий музыка мәдениятын көрсетпекте. Фестиваль шеңберинде өткерилетуғын илимий-әмелий конференциялар болса Шығыс халықларының музыка мәденияты тарийхын ҳәм дәстүрлерин үйрениӯге хызмет етпекте.
Быйыл он екинши мәрте өткерилип атырған фестиваль да ЮНЕСКОның қәӯендерлигинде өткерилетуғыны мәлим етилген.
Ҳәзирги ӯақытта Самарқандта абыройлы көркем өнер әнжуманына қызғын таярлық көрилмекте. Фестивальға таярлық көриӯ ҳәм оны өткериӯ бойынша Самарқанд ӯәлаяты ҳәкимлигиниң илажлар бағдарламасы тастыйықланған. Оған бола фестиваль менен байланыслы ҳәр бир процесс итибарға алынып, 18 жумысшы топар шөлкемлестирилди. Олардың жумысын муӯапықластырыӯ ҳәм таярлық жумысларын кең көлемде, белгиленген ӯақытта және сапалы орынлаӯ бойынша штаб жумысы жолға қойылды.
—Ҳәр бир жумысшы топардың ӯазыйпасы анық белгилеп берилген, — дейди фестивальға таярлық көриӯ ҳәм өткериӯ бойынша штаб баслығы Ш.Йӯлдошев. —Соның ишинде, мийманларды күтип алыӯ ҳәм шығарып салыӯ ушын тийисли тараӯлардың ӯәкиллеринен ибарат топар, мийманханаларға орналастырыӯ бойынша айрықша топар, гид-дилмашларды ажыратыӯ, транспорт хызметин көрсетиӯ, ӯәлаяттағы тарийхый-мәдений естеликлерге саяхатқа алып шығыӯ, мәдений илажларды шөлкемлестириӯ бойынша ҳәм басқа да топарлардың жумысы жолға қойылды. Ҳәзир Самарқанд қаласындағы мийманханаларда фестиваль қатнасыӯшылары ҳәм мийманлар ушын орынлар белгилеп алынған. Қайсы асханаларда аӯқатландырыӯ бойынша да анық режелер бар. Фестиваль шеңберинде өткерилетуғын «Шығыс халықларының дәстүрий музыка көркем өнерин раӯажландырыӯ перспективалары» темасындағы халықаралық илимий-әмелий конференцияға Самарқанд мәмлекетлик университетиниң басшылығында таярлық көрилмекте.
Илажларда планетамыздың түрли аймақларынан, бир неше тиллерде сөйлесетуғын мийманлардың қатнасатуғынлығы есапқа алынып, Самарқанд мәмлекетлик шет тиллер институтынан инглис, рус, корейс, италян, испан, француз, немис, қытай, япон ҳәм араб тиллери бойынша 200 жоқары маманлыққа ийе оқытыӯшы және студент гид-дилмаш сыпатында таңлап алынды.
Дәстүрге бола, фестиваль қатнасыӯшылары таңлаӯдағы шығыӯларынан басқа ӯақытта Самарқанд қаласында, сондай-ақ, Ақдәрья, Пайариқ, Пастдарғом, Жамбой ҳәм Самарқанд районларындағы дем алыӯ бағлары, музыка ҳәм көркем өнер мектеплери, халықтың дем алыӯ орынларында концерт бағдарламаларын көрсетеди. Бул мәдений бағдарламалар ушын оннан аслам орын таңланып, усы жерлерди абаданластырыӯ, қосымша қолайлықларды жаратыӯ жумыслары алып барылмақта.
Фестивальдың бас сахнасы – Регистан майданында болса Өзбекстан халық артисти Б.Йӯлдошевтиң басшылығында «Шарқ тароналари» он екинши халықаралық музыка фестивалының салтанатлы ашылыӯ мәресиминиң таярлықлары даӯам етпекте.
Ғ.ҲАСАНОВ,
ӨзАның хабаршысы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған