МАЙ ҚАБАҚЛАР

Қабақлардан үй-руӯзыгершилигинде көп қолланған. Солардың ишинде май қабақтан май қуйып қойыӯда пайдаланған. Май қабақ сопақлаӯ болып келип, үндеӯ белгисине ямаса термосқа көбирек уқсап кетеди. Оның аӯзының төмен мүйешинен еки жағынан тесик тесип, баӯ тағылады. Бундай май қабақларға 2-3 кг май сыяды. Бул ыдысқа май толтырып, аӯзына тыйын тығып, баӯынан қара үйдиң жоқарысына илдирип қояды. Май сиңген қабақ бир-еки жылдан кейин гүнжи майындай қызыл реңге енеди.
Қарақалпақ халқы қолында бар барлық затлардан өнимли пайдаланып келген. Олардың шеберлигин қабақларды турмыста ҳәр түрли мүтәжлигине сай қолланғанынан да көриӯимизге болады. Қабақлар нәрестелердиң ойыншығы хызметин де атқарған. Көбинесе, оны қызлар қуӯыршақ етип ойнаған.
Алма қабақты ер балалар ойыншық еткен. Соны айтып өтиӯ орынлы ертеде алма қабақты нышана орнында пайдаланып, мергенликти сынаған. Ол ҳаққында халық дәстанларында толық сәӯлеленген. Ал, усы дәстанлардағы алтын қабақ аттырды дегенлер негизинде алма қабақларды сары реңге бояп, нышанға қойған болыӯы мүмкин.
Бул қабақлардан суӯ қабақ, май қабақ ҳәм насыбай қабақлар бизиң Қарақалпақстан Республикасы тарийхы ҳәм мәденияты мәмлекетлик музейинде сақланбақта.
Нуржамал САЛИЕВА,
музейдиң жаңа тарийх бөлими аға илимий
хызметкери

Пікір үстеу

Э-пошта мекенжайыңыз жарияланбайды. Міндетті өрістер * таңбаланған