«ӘЙЙЕМГИ ХОРЕЗМ ОССУАРИЙЛЕРИ»

16-август күни Қарақалпақстан Республикасы И.В.Савицкий атындағы мәмлекетлик көркем өнер музейиниң археология бөлими тәрепинен «Әййемги Хорезм оссуарийлери» атамасында көргизбе шөлкемлестирилди.
Илажда музей директоры Г.Изентаева, белгили археолог, Өзбекстан қаҳарманы, сенатор Ғ.Хожаниязов, Сидней университетиниң профессоры археолог Э.Беттс, Өзбекстанға хызмет көрсеткен жаслар устазы, Қарақалпақстан халық художниги Ж.Лепесов ҳәм қалалық ҳаял-қызлар комитети ӯәкиллери сөзге шығып Қарақалпақстандағы тарийхый орынлар, олардан табылған ерте дәӯир мәдениятын үйрениӯдиң аҳмийети, дүнья тарийхында тутқан орны ҳаққында өз пикирлерин билдирди.
Көргизбениң тийкарғы мақсети музей фондында сақланып атырған ҳәр қыйлы материаллардан таярланған өзгеше формадағы оссуарийлерди көрсетиӯ ҳәм олар ҳаққында тамашагөйлерге кеңирек мағлыӯмат бериӯ болып табылады.
Көргизбеде ерте дәӯирлерге тийисли болған Қарақалпақстан жеринде жайласқан естеликлерден қазып алынған экспонатлардан 200ден аслам оссуарийлер бөлеклери бар болып, олар Қубла Арал бойы аймағынан табылып, усы жерде әййемги дәӯирлерден берли жасап атырған халықлардың мәденияты, үрп-әдетлери, турмысы ҳәм диний көз-қарасларынан дәрек бериӯши экспонатлар орын алған.
Көргизбеде Миздахан ҳәм Төкқала естеликлеринен табылған оссуарийлер, өлшемлери ҳәм категориялары бойынша таңлап алынып, олар бир биринен ажыралып турады. Олар тийкарынан ҳәр қыйлы материаллардан (ылай, тас, алебастр) ҳ.т.б буйымлардан исленген. Ал формасы жағынан олар мүсин, шатыр, қуты көринисиндеги оссуарийлер болып бөлинеди.
Кешеге келген мийманлар көргизбени үлкен қызығыӯшылық пенен тамашалады.
Азиз ПИРЛЕНОВ,
арнаӯлы хабаршымыз

Пікір үстеу

Э-пошта мекенжайыңыз жарияланбайды. Міндетті өрістер * таңбаланған