УЛЛЫЛАР УМЫТЫЛМАЙДЫ

И.В.Савицкий 1915-жылы Киев қаласында туӯылған. Ол Москва Политехника институтының графика бөлиминде, Суриков атындағы Москва көркем өнер институтында сүӯретлеӯ өнери сырларын белгили художниклер Р.Фальк, Н.Ульянов, К.Истоминлерден тәлим алады.
1942-жылы ол оғып атырған Суриков атындағы институт Самарқандқа эвакуация қылынады. Бул жағдай оның өмиринде ҳәм дөретиӯшилигинде үлкен өзгерислерге себепши болады. Ол 1950-1957-жыллар аралығында Хорезм археология-этнографиялық экспедициясы қурамында художник сыпатында Қарақалпақстанға келеди. Оның Қарақалпақстанға келиӯи көркем сүӯретлеӯ өнери сырларын ашыӯы ҳәм өзиниң талант қырларының өсиӯине түртки болады. Қуяшлы үлкемиз тәбияты оған илҳәм бағышлап, әжайып пейзажлар дөретеди.
И.В.Савицкий 1960-жылдан баслап жыйнаӯшылық жумыслары менен шуғыллана баслайды. Оның бул искерлиги нәтийжесинде 1966-жылы археология, қарақалпақ халық қол өнери ҳәм сүӯретлеӯ өнери бөлимлеринен ибарат музей шөлкемлестирилди.

Халық мәпин өз мәпинен үстин қойып, өмири даӯамында халыққа пидайылық пенен хызмет еткен инсанлардың өзи өлсе де иси өлмей, халқы менен жасай береди. Усындай инсанлардың бири Өзбекстан Республикасына мийнети сиңген көркем өнер ғайраткери, Қарақалпақстан халық художниги, Бердақ атындағы мәмлекетлик сыйлықтың лауреаты ҳәм «Уллы хызметлери ушын» ордениниң ийеси, Қарақалпақстан Республикасы И.В.Савицкий атындағы мәмлекетлик көркем өнер музейиниң тийкарын салыӯшы, коллекционер, художник, көркем өнертаныӯшы, археолог, этнограф, реставратор Игорь Витальевич Савицкий болып табылады.
Ол тийкар салған музей топламы арқалы республикамыз дүньяға даңқы жайылған көркем өнер музейине ийе болды. АҚШ, Япония, Уллы Британия мәмлекетлеринен келип, музей ҳаққында ҳүжжетли фильмлер сүӯретке алынды. Айта берсек бул музей ашылғалы берли нәтийжели жумыс ислеп, көплеген жетискенликлерге еристи. Музейде алып барылып атырған жумыслар ҳәм табыслары ҳаққында газетамыз арқалы жақсы таныссыз.
Қарақалпақстан Республикасы И.В.Савицкий атындағы мәмлекетлик көркем өнер музейи жәмәәти ҳәр жылы И.В.Савицкийдиң туӯылған күнин байрам сыпатында күтип алады. Оның ислерин даӯам еттириӯши кәсиплеслери қәбирине гүллер қойып, зыяратлап, еслеӯ кешесин өткериӯди дәстүрге айландырған.
5-август күни музейде И.В.Савицкийдиң туӯылғанының 104 жыллығына бағышланған еслеӯ кешеси болып өтти.
Кешени музей директоры Г.Изентаева ашып берди.
Илажда И.В.Савицкий менен узақ жыллар бирге жумыс ислеген музей хызметкерлеринен, нураный апаларымыз В.Сычева, А.Пирназаровалар оның өмири, дөретиӯшилик мийнет жолы ҳаққында айта келип, бирге ислеген дәӯирлерин еске алып, жумыс баслаған дәӯирдеги жүз берген қыйыншылықларды, машақатлы жолларды басып өтиӯдеги оның шыдамлылығын, сабырлылығын, алдына қойған мақсетине ерисиӯдеги табанлылығын, өз қара басының ҳәзлигин, тынышлығын ойламастан жан-тәни менен пидәкерлик мийнет еткенлигин, сондай-ақ оның көпшиликке үлги боларлықтай адамгершилик пазыйлетлерин мақтаныш пенен еске алды. Соның менен бирге оның ислерин даӯам еттирип, музей жумысларын еле де раӯажландырыӯда музей хызметкерлериниң жумысларында раӯаж тиледи.
Илаж соңында жыйналғанлар И.В.Савицкийдиң өмири ҳәм дөретиӯшилиги ҳаққындағы ҳүжжетли фильмди тамашалады.
Еслеӯ кешесиниң мазмунлы ҳәм тәсирли өтиӯинде музей хызметкери Г.Серекееваның хызметлери айрықша болды.
Эльмира САЙТЖАНОВА,
журналист

Пікір үстеу

Э-пошта мекенжайыңыз жарияланбайды. Міндетті өрістер * таңбаланған