«САҲРА БЕМБИЙИ»

29-июнь күни Қарақалпақ мәмлекетлик Қуӯыршақ театрында Айсанем Бегимова авторлығындағы, сахналастырыӯшы режиссёр Қоблан Қалилаевтың «Саҳра Бембийи» атамасындағы ертек спектаклиниң премерасы болып өтти.
Сахнадағы тәбият көриниси, жап-жасыл дала, өсип турған сексеӯиллер адамға өзгеше заӯық бағышлайды. Отлап жүрип, топарынан айрылып қалған сайғақ баласын кишкене Байрам үйине апарып сақламақшы болады. Бирақ сайғақ баласын адамлар көп жерде сақлай алмаслығын түсинген бала оны аӯыл шетинде сақлап, Бемби деп атай баслайды. Бембиден ҳәр күни хабар алып, от-жемин берип турады. Ҳайӯан баласы адамлардың өзине көрсеткен ғамхорлықларын сезип, Байрамға баӯыр басып қалады. Ҳәр күни ол келгенде ойнақлап алдынан шығып күтип алады.
Байрамның сайғақ баласын бағып атырғанынан хабар тапқан аӯыллас жорасы әкесине айтып аттырмақшы болады. Буннан қәӯетерленген Байрам атасын жәрдемге шақырып, екеӯлеп сайғақ баласының өз үйирине қосылыӯына жәрдемлеседи. Жақсы адамлардың жәрдеминде сайғақ баласы тири қалады.
Солай етип, балалардың кеӯлине жақсылық нурларын шашып, оларды кишкене пайытларынан баслап Ана тәбиятымызды сүйиӯге, онда жасаӯшы қусларды, ҳайӯанатларды асырап-абайлаӯға шақырыӯшы бул мазмунлы дөретпениң жас өспиримлер тәрбиясында тутатуғын орны айрықша.
Өзбекстан Экологиялық ҳәрекети Қарақалпақстан аймақлық бөлими баслығы Айсәнем Бегимованың мазмунға бай, бүгинги күнниң актуал мәселелерине бағышлап жазылған, драматургиядағы туңғыш дөретиӯшилик мийнетин кишкене тамашагөйлеримиз үлкен қызығыӯшылық пенен қарсы алды. Сюжеттиң анықлығы, ӯақыялардың избе-излик пенен орынлы пайдаланыӯында, актёр-актрисалардың рольлерге бекитилиӯинде, қуӯыршақлардың ҳәрекетлеринде тәжирийбели режиссёрдың талапшаңлық пенен ҳәрекет еткенлиги айқын сезиледи.
Декорациялар ҳәм сахнаның спектакль ӯақыяларына сай безелиӯинде сахналастырыӯшы художник М.Байгелдиевтиң хызметлерин атап өтиӯ орынлы. Сес режиссёры С.Сырғабаева тәрепинен таңланған музыкалар темаға үнлес, персонажлардың характерине сәйкес болып, тамашагөйлер кеӯлине қонымлы шықты.
Мазмунлы, тәсирли ӯақыялар, қызықлы мәӯритлерге бай ертек-спектакльдеги рольлерди театрдың талантлы актёрларынан: Н.Генжебекова (Бемби), Қ.Қырғызбаев (Ата сайғақ, Аңшы), А.Бердибеков (Ер сайғақ, Ғарры), Г.Ешмуратова (Ана сайғақ), И.Джуманиязова (Бала), М.Байниязовлар (Бала) шеберлик пенен атқарып шықты.
Премьера соңында министрликтиң бас қәнигеси Б.Айтмуратов ҳәм Қарақалпақстан халық жазыӯшысы Х.Дәӯлетназаровлар өз пикир-усынысларын билдирди.
Эльмира САЙТЖАНОВА,
журналист

Пікір үстеу

Э-пошта мекенжайыңыз жарияланбайды. Міндетті өрістер * таңбаланған