ДӨРЕТИУШИЛИК БАЙЛАНЫСЛАР

13-апрель күни Бердақ атындағы Қарақалпақ мәмлекетлик академиялық музыкалы театрында Германия Республикасының Өзбекстандағы елшиханасы Өзбекстан Республикасы Мәденият министрлиги менен биргеликте шөлкемлестирилген «Қуӯыршақ» атлы даӯыссыз кино комедиясы Өзбекстан мәмлекетлик «Сӯғдиёна» халық саз әсбаплары камер оркестриниң музыкалы шериклигинде кең жәмийетшиликке усынылды.
1919-жылы режиссёр Эрнест Любич тәрепинен сүӯретке алынған бул фильмде бай Баронның Жийени оның мал-дүньясына мийрасхор болып қалыӯ мақсетинде үйленбекши болады. Бирақ, шаңарақ қурыӯды қәлемеген Жийен адамға уқсас Қуӯыршаққа үйленбекши болып, ҳийле ойлайды. Усы тақылетте ӯақыялар раӯажланып, байып барады. Фильм соңында болса Жийен қуӯыршақ соғыӯшы устаның ҳақыйқый қызына үйленеди.
Бир саат даӯам еткен фильмге музыкалық безеӯ берип, тамашагөйлерди жанға жағымлы намалар ырғағында жүздирген «Сӯғдиёна» халық саз әсбаплары камер оркестриниң көркемлик жақтан басшысы, дирижёр, Өзбекстан көркем өнер ғайраткери Феруза Абдираҳимова басшылығындағы шебер сазенделери бәршеге хош кейпият инам етти. 1991-жылы шөлкемлестирилген камер оркестри халықаралық фестивальлар ҳәм «Golden Trophy» таңлаӯының лауреаты. Жәмәәт жәҳән көркем өнер шеберлери менен дослық байланысларды орнатыӯды өзлерине нийет еткен. Талантлылардан жәмлескен оркестр германиялы көркем өнер шеберлери менен тығыз ислесип келмекте. Буннан алдын оркестр немис классикалық ҳәм заманагөй музыкалары концерти ҳәм «Шығанақлар маликасы» даӯыссыз фильмине музыкалық шериклик еткен.
Илаж соңында оркестр дирижёры Ф.Абдураҳимова сөзге шығып Қарақалпақстан Республикасы Мәденият министрлигине, Өзбекстан мәмлекетлик филармониясы Қарақалпақстан Республикасы бөлими ҳәм академиялық театр жәмәәтине өз миннетдаршылығын билдирип, өзлери тәрепинен таярлап келген китапларды Нөкис қәнигелестирилген мәденият мектеби, Жаслар халық сазлары оркестри жәмәәтлерине тапсырды. Оркестрдиң кейинги сапары Мойнақ районына болды. Райондағы 2-санлы Балалар музыка ҳәм көркем өнер мектебинде жәмәәт усы мектеп ҳәм Хожели районындағы 4-санлы БМКӨМ оқыӯшыларына «Шеберлик сабақ» ларын өтип, китаплар саӯға етти. Соң оркестр жәмәәти репертуарындағы сайланды шығармаларынан ибарат концерт бағдарламасын усынды.
—Еки күн даӯамында елимизде сапарда болған оркестр жәмәәти халқымызға әжайып концерт бағдарламасын инам етиӯ менен бирге Мойнақ районында болып, бул жердеги жаңаланыӯлар, өзгерислер менен жақыннан танысып, райондағы БМКӨМ де оқыӯшыларға «Шеберлик сабақ»ларын өтти. Жәмәәт басшысы Ф.Абдураимова ҳәм ағзаларынан: Өзбекстанда хызмет көрсеткен артист О.Назаров, «Ниҳол» мәмлекетлик сыйлығының лауреаты: У.Юнусов, халықаралық таңлаӯлар жеңимпазлары: Н.Мелибаева, Д.Мелибаев, Б.Тӯраев,С.Қадиров, О.Мискиновлар еринбей, бар ықласы менен көркем өнерге қызығыӯшылығы бәлент жасларымыз бенен бирге ислесип, олардың билимлерин асырды. Әлбетте, бундай илажларды шөлкемлестириӯден тийкарғы мақсетте миллет таңламас музыканың қүдиретин халқымызға көрсетиӯ, қалаберди қәбилетли жасларымыздың тәжирийбелерин асырып, оларға дурыс бағдар көрсетиӯ, — дейди Өзбекстан мәмлекетлик филармониясы Қарақалпақстан Республикасы бөлиминиң бас қәнигеси Айдосбек Бекпанов.
Гүлмира ПАЛӮАНОВА

Пікір үстеу

Э-пошта мекенжайыңыз жарияланбайды. Міндетті өрістер * таңбаланған